ഭൂമിയുടെ അവകാശി

കുറച്ചു നാളായുള്ള അന്വേഷണമാണ്

മഴ ഉള്ളപ്പോഴും
മഴ ഇല്ലാത്തപ്പോഴും

സൂര്യന്‍ മേഘങ്ങള്‍ക്കിടയില്‍ ഒളിക്കുമ്പോഴും
ഭൂമിയിലേക്കു പെയ്തിറങ്ങുമ്പോഴും

അമ്പലപ്പറമ്പില്‍ പൂരം പുറപ്പെടുമ്പോഴും
ആറാട്ട് നടക്കുമ്പോഴും
അന്വേഷണം പുരോഗമിക്കുകയായിരുന്നു

ഏറെക്കാലത്തിനു ശേഷമാണു പെട്ടെന്ന് അവനെക്കുറിച്ച് ഓര്‍മ വന്നത്
ഇത്രയും കാലം എന്തേ അവനെ മറന്നു - ഉള്ളില്‍ ഒരു നീറല്‍

തുടര്‍ന്ന്‌
ഓരൊ ദിവസത്തെയും അന്വേഷണത്തിനു ശേഷം ആ സത്യം
എന്നെ ഭയപ്പെടുത്തി തുടങ്ങി..
ആദ്യമാദ്യം മനസ്സില്‍ ഒരു ചെറിയ അസ്വസ്ഥത രൂപപ്പെട്ടു വന്നു...
അതിനു ആകാരം വെച്ചു
അതിനു പിന്നെ ആനയുടെ വലുപ്പമായി

അന്വേഷണം ഞാന്‍ മതിയാക്കി
നാളെ പത്രത്തില്‍ ഒരു പരസ്യം കൊടുക്കണം

കുഴിയാനയെ കാണ്മാനില്ല.